صحافتنا الموقرة

في البداية جم تنويه و تذكير


أولا : اليوم ٧:٣٠ ساحة الارادة لكي نسجل موقفنا من التكفيريين



ثانيا : أمس إحترمت بعض وجهات النظر "المتأسلمة " و ما كتبت الموضوع لأنه يوم سبت عشان لا يقولون تشبه باليهود
و أعتذر مقدما من ((( الشعب الكويتي ))) المسلم و المحافظ و المختار و اللي دينهم بروحهم إني أكتب اليوم (الاحد) وهو يوم النصارى (وليس المسيحيين) و طبعا ما ننسى نذكر بعد اللي يقول الشعب الكويتي جُبل على القيم و مادري شنو ،، "تدرون إن الخمور منعت بالكويت أواخر السبعينيات ؟؟؟؟؟ " سلم لي على المحافظ و إنت رايح له



ثالثا : حق المسلمين الجدد !! إللي يقولون إحنا نحترم كافة وجهات النظر و نقبل بالحوار ولكن لازم على أسيل إنها تعتذر و تقر إن الحجاب فرض و عقيده في الاسلام ،، الرد بسيط جدا ما تفوهت به الدكتوره ""من تفسير"" مو على مزاجها إرجعوا إلى تفسير الطبري و اذا انتوا ما تأخذون فيه غيركم يأخذ وهي وجهة نظر غصبن على إلى ما يرضى .ملاحظة : المره اليايه لا تستحون تحطون دولة الكويت في فضايحكم اذا انتوا واثقين منها مو فيديو البلد المغرب و الثاني المكسيك و لي ييتوا تعلقون كونوا مدونين مو نفس الشخص بمليون اسم غير معرف..



رابعا وهو المهم : أعتذر بالبداية لأني حديث في عالم التدوين ولكن وجهة نظري الشخصية بقولها : مقومين الدنيا و مو قاعدين مو على أسيل لا على رفعة قضية على مدون ولا ما رفعة و فجأة الكل صار دستوري و الكل ينادي بحرية الرأي ،، أنا أقول كبروا عقولكم الدستور ما يمشي بروحه بدون قوانين و حرية الرأي مكفولة وفقا للقانون و قانون الانتخاب يجرم أي تشهير أو بث أي شيء يتعرض لأي مرشح و و و و
و بعدين إذا واحد زور شي و نشره بإسم شخص ثاني كمقالة ما يحق للطرف الثاني إنه يشتكي ؟ ياخي ما يحق للطرف الثاني أو الاول إنه يرفع قضية عشان يأكد الحق سواء ببطلان الدليل أو تثبيته ؟؟ و مادري جم عدد المدونين الكويتيين بس ما اتوقع إن عددهم يخوف هالكثر و العالم يكسبون رضاهم لا و نصهم ما يصوتون و نقول ربعهم حديثي الجنسية و قيس جم واحد فيهم يعني مادري على شنو هالهبه ترى اللي حرك الشارع من المدونين معروفين و رواد التدوين بالكويت معروفين ، لا نصعد على ظهور غيرنا



--



بعد المقدمة الطويلة



موضوعي عن الصحافة في الكويت



صراحة أثبتنا بالكويت إنه أحنا صج صج شعب (مكاري) *



من شالوا الرقابة عن الصحافة و فتحوا باب التراخيص و تراكضوا العالم كل واحد يبي يفتح جريدة حق ربعه ما قلنا شي



بس ياخي لي متى الجذب ؟؟ ترى ملينا






الجرايد القديمة ماشاء الله نقدر نقول عروقهم بالماي طبعا كله مصادر سرية و كله مصادر مطلعة و أخبارهم كلها تقارير سرية !!



شدعوة عاد الدايلي تيليغراف ولا الواشنطن بوست وانا مادري يعني لو يحطون صورة أو شي أوكي نقدر نقول في فئة حمير يمكن يصدقون بس المشكلة إنه كلها مصادر و مصادر إنزين منو مصادر !! مادري ،، شنو صادر هم مادري



هذيل مرفوع عنهم القلم من زمان يعني الوطن و عقدة التيار الوطني "كاشف بوقاتهم" ، السياسة " عقدة سوريا و كل واحد سوري و كل واحد يعرف واحد سوري و كل واحد يعرف واحد يعرف واحد سوري و كل واحد بيوم من الايام صلح سيارته بكراج عند سوري " ، الأنباء و أخبار لبنان يا دلي يا دلي ، القبس و عقدة شيوخ الرياضة ، الرأي و عقدة الفضايح و كل ما يتعلق في جمهورية مصر العربية ،،،،






أما عيال مقلمة و محايتين و برايه أم منظرة



عيال أمس مادري أولت أمس ،، إنتوااااااا شكووووووو بكلمة مصادر موثوقه بالله متى إنعرفتوا عشان يثقون فيكم العالم ؟


؟
يعني جريدة قبل إسبوع نزلت (الحرية) أول عدد فيها يقول و قد بينت مصادر موثوقه أنه ،،،، لا و يعني أحنا يسمووونا إخوان المعارضة بالرضاع من طرف أمها !! ( نفس عذر كل صبي مطلع صاحبته و يوقف بتفتيش على طول بنت خالتي ) شلون يحطون مصداقية حق روحهم



دوروا منوا كان معارضه قبل و كلامه كان يأثر شافوا ( الطليعة "مبروك النزول مره ثانية بس شدعوه ربع دينار على ١٢ ورقة ، ذهب ؟ ) المهم شافوا إن كل واحد يبي يجذب و يبي يعطي مصداقية يكتب لك الكاتب (المحرر السياسي) يعني خبر المصادر موثوق و من قوته أبد ما يقدرون يحطون إسم الكاتب عشان لا ينتل ولا ينرقع بقضية !!
شدعوة ناشرين منشورات محمد علي أيام الثورة المصرية ، أقصاها فلان يقول القروض ماراح إتطيح يبا حافضينها حجي دواووين خو الحجي إبلاش بالكويت و الكل ماشاء الله يقول والله انا سامع !! أبي منووووو الللي سمعك ؟ منو اللي يقولون ؟؟ الجواب معروف (يقولون بعد شنو منو يقولون الناس )




أدري إنه مدونتي مواضيعها مو قوية

ولا تأثر ولا تهم البعض

ولا رادين علي أللهم إذا بصير مادة دسمة

اذا فلس البعض من المواضيع

لكن اسمها مدونه اطلع فيها حرة قلبي

جبدي منبطة
و نسبة الدم عندي واصلة ٢٣٤ hp
و الدكتور قال لي حاول لا اتنرفز ولا اتدخن ولا تشرب قهوه و رد بول بس اللي يعيش بالكويت غصبن عليه يتنرفز عالم مادري شلون قايله صج صج مو كفو نعمه


* مكاري : صفة كانت تطلق على الكويتيين أنهم شعب مكاري أي أن ساعة الصجية الكل يقول هذا مو شغلي انا شعلي وانا شكو يا معود و من هالحجي يعني باختصار التخلي عن المسؤولية